الطب البشري 😍
منكمّل معكن اليوم ببوستنا التعريفي التاني عن التخصص محبوب الجماهير 😀
إنه الطـــــــــب البشــــــــــــري
“” أن تكون طبيب فقد تحقق الحلم أما أن تكون طبيب ناجح فقد تحققت المعجزة
حكينا بالبوست السابق عن السنة التحضيرية واللي هيي بوابة ل 3 مجالات ؛ منن الطب البشري، الفرع اللي 99.9 % من الأهالي بدن ولادن يدخلوه حتى لو كانو أدبي 😛
أكيد كلكن آخذين عنو فكرة أنو صعب بس بالحقيقة مافي شي صعب مع العزيمة والنية الصادقة 😀 ، وما في شي سهل مع الكسل والإهمال🙃.
إذا بدك تدخل طب مشان (اتفضل حكيم) و(بالصدارة دكتور)؛ فشو قيمة المكانة الاجتماعية اذا ما كنت مرتاح وحابب مجالك .. وإذا بدك تدخل طب مشان المصاري، ففيك توفر دراسة 10 سنين بفرع سنواتو أقل ويكون ربحو أكتر، هاد عدا أنو المردود المادي للطب متأخر نسبيا.
المعايير الأهم هيي الميول، الصبر، الثقة، الهمة ع الدراسة والهدف الإنساني
((ملاحظة للبنات: إذا بتخافي من الدم والجروح والكسور ، هالشي مو عائق لأنو كل الخوف بروح عالممارسة 😀 ))
وهلأ خلونا نفوت بتفاصيل دراسة فرعنا الجميل اي
مدة الدراسة:
دراسة الطب 6 سنين (من ضمنن السنة التحضيرية) بتتوزع الدراسة بالشكل التالي:
*السنة التحضيرية + الثانية + الثالثة: دراسة الأساسيات مثل (تشريح ، فيزيولوجيا، جنين، مناعة، نسج، اداب الطب …)، في مواد الها عملي عليه 30 علامة وهون بكون النظري من 70، وفي مواد فقط نظري يعني من 100.
*السنتين الرابعة والخامسة: فين بتحس حالك أنك دكتور لانو بتدرس فيهن السريريات بكل المواد (التعامل مع المرضى والتشخيص والعلاج) مثل (باطنة قلبية، هضمية، دم، عصبية، توليد …)، وهون ما في عملي ضمن الكلية إنما ستاجات ضمن المشافي (المواساة، الأسد، الجلدية ، التوليد، الأطفال)
*السنة السادسة هيي سنة تدريب بينعاد فيها ستاجات الرابعة والخامسة وكلها ضمن المشافي، وبنهايتها الفحص الوطني الأساسي بالاختصاص.
خلافاً لطب الأسنان والصيدلة اللي فيك تمارس مجالك بعد 5 سنين لو ما تابعت اختصاص، فالطب البشري ما فيك تفتح عيادة الا ليكون معك اختصاص بمجال معين (عينية، أذنية، قلبية ، أطفال ….)، السنوات بتترواح من 4-6 حسب الاختصاص، وهي السنين تعتبر دراسة وشغل بنفس الوقت (يعني في راتب أثناء الاختصاص)، أما اختيار الاختصاص فهاد حسب معدل السنوات الخمسة + علامة الفحص الوطني <<< يعني لازم تهتم بعلاماتك ليكون عندك خيارات واسعة باختيار الاختصاص 😭
أوقات الدوام:
*بأول 3 سنين: المحاضرات النظرية يومياً من 8 لل 12 (الحضور مو الزامي بس هام ببعض المواد)، أما العملي ف 3 أيام بالاسبوع حسب الفئات، وبعد النظري (الحضور الزامي ومدة العملي 2-3 ساعات).
*بالسنتين الرابعة والخامسة: بتبلش بالستاجات ضمن المشافي من 8 لل 11 او 12، وبعدها محاضرات النظري بالجامعة
*السنة السادسة: بس بالمشافي من الصبح للظهر.
*الاختصاص: حسب كل اختصاص بس إجمالا من 8 لل 4 العصر ، وممكن يكون في مناوبات (يعني بتضل بالمشفى لتاني يوم)
طرق ومصادر الدراسة:
طريقة الحفظ البصم والحرفي تبع البكالوريا بدك تنساها، لأنو البكالوريا ولا شي مقارنة بمواد الطب 😛 طبعا عم نحكي من حيث الحجم ، بس الميزة انو امتحانات الطب كلها مؤتمتة (اختيار من متعدد)، فاطلاعك عالمعلومة وفهمها وتحديد الكلمات المفتاحية وحفظها كافية لتجاوب ع الاسئلة (طبعا التركيز بالدراسة ثم التركيز بالمراجعة ثم التركيز بالامتحان شي أساسي)، وأهم شي تنظيم الوقت يعني مو معقول تترك مادة عملاقة لقبل الفحص بكم يوم..
مصدر الدراسة متوافر سواء كان كتاب أو محاضرات بيكتبوها زملائكن بالفرق المختلفة.
بالرغم أنو المشوار طويل بس حلمك بيستحق الصبر، واتذكر أنو دعوة صادقة من مريضك بتنسيك كل تعبك
ودمتم بخير 😀
انتظرونا بكرا ببوست تعريفي جديد عن فرع كمان الكل بحبو … طـــب الأسنـــــان